NKorea-in nuclear test hlawhtling takin a nei

North Korea chuan nuclear test hlawhtling taka a neih thu a sawi a, hei hi a ṭhenawm ram South Korea leh US chuan an sawisel nghal.

South Korea meteorological agency chuan nimin zing khan an ram hmarlam chu magnitude 5.3-a nain a nghing niin a sawi a, hei hi North Korea-in nuclear a test vang niin official-te chuan an sawi. A test thar ber hi kumin January thlaa a lo enchhin tawh aiin a letin a thawk na tih an sawi.

North Korea TV chuan nimin khan hmarlamaa nuclear en≠chhinna hmunah scientist-te chuan nuclear ralthuam an siam thar an enchhin niin puang a, rorellai party Workers' Party Central Committee pawhin nuclear scientist-te hi lawmpui thu an thawn nghal a ni, a ti. Enchhinna hlawhtling tak an neih aṭang hian North Korea chuan ralthuam te leh zangkhai zawk, mahse thawk na zawk thei an siam thei ta tih a tilang bawk a ni, a ti.

SKorea hmarlam, NKorea nuclear test-na bula lei nghawr hi US Geological Survey leh Jan Meteorological Agency-a lirnghing leh tsunami zirchiangtu division lam pawhin an lo hria a ni.

USGC chuan nimin zing dar 9.30 khan SKorea rama lei nghawr≠nghing hi an hriat thu sawiin, a inṭanna hi Sungjibaegam hmarchhak lam km 18 vel hla niin a sawi.

SKorea President Park Guen-hye-i chuan NKorea-in atomic test a nei leh chu UN Security Council resolution palzutna leh ngaih pawimawh lohna lian tak a ni, a ti. He thil thleng chungchang hi US President Barack Obama nen pawh telephone-in an sawizui nghal niin president official chuan a tarlang bawk.

Japan Chief Cabinet Secretary Yoshihide Suga chuan NKorea-in nuclear a test leh avang hian hrekna na zawk siamsak an tum tih a sawi nghal a, NKorea-in nuclear ralthuam a siam chuan Japan ram himna a tiderhthawng hle a ni, a ti.

China pawhin NKorea test neih chu a dem thu a sawi a, khawvel ram hrang hrangten an dodal chunga test a nei leh chu an dem hle tih sorkar website-ah an tarlang.