Russia puihnain Iran-in nuclear plant siam dawn

Iran chuan an ram chhim lama lawngchawlh hmun, Bushehr khawpuiah Russia ram puihnain nuclear power plant a siam dawn a, Inrinni khan hna bul ṭan a ni.

Atomic Energy Organization of Iran hotu, Ali Akbar Salehi chuan enegy siamna tur nuclear plant siamna hna chu boruak ṭha tak hnuaiah an thawk dawn tih a sawi a, he project hi International Atomic Energy Agency nena Safeguards Agreement an lo siam tawh huang chhungah thawh a ni dawn a ni, a ti.

Inrinni-a project bul ṭanna inkhawm buatsaih chu Iran First Vice President Ishaq Jahangiri leh Russia Rosatom State Atomic Energy Corportion hotu Sergey Vladilenovich Kiriyenko-te'n an hmanpui a ni.

Salehi chuan September 1 khan Iran leh Russia chuan Bushehr-a nuclear power plant pahnih siamna turin inremna an siam tih a sawi a, a siamna tur senso atan hian US dollar tluklehdingawn 10 ruahman a ni a , kum 10 chhunga peihfel hman tum a ni.

Nuclear power plant pahnih hi siam zawh a nih hunah Iran chuan kumtin oil a hmanral aṭanga barrel maktaduai 22 vel chu a hum thei dawn niin Salehi chuan a sawi.

Salehi chuan power plant thar siam hian greehouse gas an tih≠chhuah ṭhin chu kumtini ton maktaduai 14 velin a tlem phah thei dawn niin a sawi bawk.

Kum 1975 khan Germany company-te chuan Bushehr Nuclear Power Plant hmasa ber a lo siam tawh a, mahse he plant-a hnathawhte chu US-in Iran rama high-tech suppy a khap avangin tihtawp a ni. Kum 1998 khan plant siam chhunzawm hna thawk turin Russia chuan Iran hi contract a siampui a ni.