Turkey-in municipal mayor 28 ban

Turkey sorkar chuan Kurdish helpawl nena inzawmna neia puhin municipal mayor 28 a ban a, anmahni thlaktu tur a ruat nghal.

Municipal mayor ban tak zinga municipality 24 hi Parliament-a party lian pathumna, Kurdish thlawptu People's Democratic Party (HDP) leh tualchhunga an thawhpui rorelna a ni. Municipality dang pali zinga pathum chu Turkey-a rorellai, AK party te chakna niin, pakhat hi eptu pawl MHP rorelna a ni.

Turkey President Tayyip Edrogan chuan Ningani khan Kurdish helpawl, Kurdistan Workers Party (PKK) nena inhnamhnawihna neite dapchhuah hna an thawk zel dawn tih a sawi.

Turkey sorkar hian PKK thlawpah puhin zirtirtu sing chuang zet a lo ban tawh bawk a, Inrinni khan zirtirtu ban tak zinga ṭhenkaht chuan Diyarbakir-ah lungawi lohna lantirin an pungkhawm a, police-ten hnawhdarh nan water cannon an hmang a, an zinga eng emaw zat a man bawk.

PKK hi kum sawmthum chuang zet inlakhran duhin sorkar lakah an hel tawh a ni. Sorkar laka an hel aṭang hian inbeihna thlengah mi 40,000 chuang an thi tawh a, an zinga a tam zawk chu Kurds hnam an ni. PKK hi Turkey, US leh EU chuan firfiak pawlah a lo puang tawh bawk.