Bangladesh-a kangmeiah mi 24 thi

Bangladesh industrial town, Tongi-a Tampako Packaging Factory chu kar kalta Inrinni khan tuilumna khawl, boiler puak vangin a kang a, mi 24 an thi. Tongi hi Bangladesh khawpui, Dhaka hmarlam km 20 vela hlaa awm a ni.

Hospital official-te chuan kangmei chhuahna hmunah hian ruang 19 hmuh a ni a, midang panga-te chuan hliam na tak tuarin, damdawi-ina enkawl an nih laiin an thi niin an sawi.

Chhawng li-a sang, Tampako Packaging Factory-a chhiatna a thlen lai hian hnathawktu mi 100 vel an awm nia hriat a ni.

Bangladesh ramah hian factory hrang hrangten himna lam an ngaih pawimawh tawk loh avangin chhiatna a thleng fo a, nikum khan plastic factory kangah mi 13 an thi a, kum 2013 khan Rana Plaza factory chim vangin mi 1,100 chuang an thi bawk.

Boiler puah chhan hi hriat a ni lo a, factory neitu Syed Mokbul Hossain chuan boiler enfiah an nih hnuhnun ber chu a hriatchian tawh loh thu a sawi. Kangmei chhuak hi kangṭhelhtu pawlten darka nga hnuah an ṭhelh mit thei chauh a ni.