Zimbabwe-in sorkar hnathawk 25,000 ban dawn

Zimbabwe sorkar chuan sum lama an harsatna tawh mek siam-
ṭhatna kawng khat atana sorkar sum hman tihtlemna turin sorkar hnathawk lai zinga 25,000 te chu a ban dawn.

Sorkar hnathawk tam tham tak ban an nih bakah, kumtina bonus a pek ṭhin pawh a titawp dawn a, hei vang hian sorkar hnathawkte tana sum a sen ṭhin aṭangin dollar maktaduai 118 vel a hum thei dawn a ni.

Zimbabwe sorkar hian sorkar hnathawkte hlawh atan sum a seng ral hnem hle a, mahse sum lamah harsatna nasa tak a tawh mek avangin hlawh pek pawh a tihkhawtlai sak fo a ni. Kumin July thla khan hlawh tihkhawtlai sak an nih vangin sorkar hnathawkte chuan nawrh an lo huaihawt tawh a ni.

Finance Minister Patrick Chinamasa chuan Ningani-a parliament inkhawmah, sorkar chuan sum a hmuh aṭanga 97% zet chu hnathawkte hlawh atan a hmang tih a sawi a, hei hi kumtawp lamah chuan 75% a tihhniam an tum tih a sawi. Mi 25,000 ban tur hi sorkar hnathawk awm zat aṭanga 8% a ni.

Nikum khan Chinamasa chuan an ram sum dinhmun siamṭhatna kawng khat atana sorkar hnathawkte ban ṭhen rawtna hi thehluh ani tawh tih a sawi a, mahse cabinet-in he rawtna hi a lo dansak a ni. Mahse sorkar hnathawkte hlawh pekna turah sum lamah harsatna lian tak an tawh chhoh zel avangin ban
ṭhen hi a tum ta a ni.