Myanmar-in Thailand ramria scam centre aṭangin mi 270 man

Myanmar chuan Thailand nena an inrina bula online hmanga inbumna kalpuina ṭhin, scam center aṭangin Thawhṭanni khan ram dang mi 270 a man.

Misual pawlte chuan mi tam tak bumin scam centre-ah hian an thawh luih tir ṭhin a, heng zingah hian Thailand leh Myanmar inrinaah thawk pawh tam tak an awm niin United Nations chuan a lo sawi tawh a ni. Kum eng emaw zat kalpui ni tawh mah se ngaihven erawh a hlawh lutuk lo a, mahse tun hnaiah Thailand rama zin, Chinese actor Wang Xing rukbo a ni leh, a hnua ramri bula chhanchhuah a nih aṭangin heng scam centre te hian ngaihven an hlawh ta chauh a ni. Kumin January aṭang khan an rama dan loa lut, Myawaddy area-a scam compound-a thawk ram dang mi 1,303 an awm tih Myanmar thuneitute chuan hre chhuakin, an zinga 273 hi an man a ni. China, Myanmar leh Thailand official-te chuan Myawaddy-ah meeting neiin, ramria scam centre awm leh inven dan tur chungchangte an sawi ho.

Kar liam ta khan Myawaddy-a scam centre-a thawk tura chhawr luih, mi 260 te chu tlan chhuakin Thailand-ah an lut a ni. Heng mite hi thu zawhfiah an nih thu Thailand-a Tak province governor, Choocheap Pongchai chuan a sawi.