Bangladesh PM hlui Hasina-i'n an rama kir leh a tum

Bangladesh prime minister aṭanga paihthlak, India rama tlanchhe mek, Sheikh Hasina chuan Thawhṭanni, February 18, 2025 khan an party, Awami League member-te hmaah virtual-a thu sawiin, Bangladesh ramah kir lehin phuba lak ngei a tum tih a sawi. Hei hi nikum August 5-a PM aṭanga paihthlak a nih hnuah virtual hmanga amah thlawptu hmaa thu a sawi ṭum hnihna a ni.

Sheikh Hasina chuan Bangladesh sorkar lailawka hotu, chief adviser Muhammad Yunus chu na taka sawiselin, Bangladesh chu firfiak rama chantirah a puh. Amah leh a kaihhruai sorkar duh lohna lantira zirlaiten nawrh an huaihawta buaina chhuakah police eng emaw zat thi chu martar an ni, a ti. Heng police thite nupui hi virtual hmangin a kawm a ni. Bangladesh-ah a la kir leh ngei dawn a, heng police thite leh buaina chhuaka an party mi leh sa thite phuba hi a la dawn tih a sawi.

Hasina chuan Bangladesh-a buaina leh tharum thawhna thlengah mawhphurhtuah Yunun chu a puh a, amah ngei pawh nikum August 5 khan thah an tum a, mahse an rama kir leh, rorelna dik lekkawh turin Allah chuan a nunna a zuahsak a ni, a ti.