Greece mipuite ngaihdan la dawn
Leiba ngah avanga buai mek, Greece ramah Pathianni hian Eurozone-in an leiba laka khaichhuah an nih theihna tura ruahmanna a siamah mipuite ngaihdan lak a ni dawn.
Prime Minister Alexis Tsipras chuan Eurozone ruahmanna siam hi a duh lo a, vote lak hunah pawh a duh lo lamah thlak turin mipuite a lo ngen tawh. PM hian 'No vote' thlawptute'n rally an huaihawt turah pawh tel a tum.
Hetihlai hian European Union hruaitute chuan ruahmanna an siamte duh lo lam an chak chuan Greece chu Eurozone aṭanga a chhuah mai a ngai dawn tih an sawi thung.
Greece leiba neihte chinfel dan kawng zawnga Greece sorkar leh EU aiawhte'n inremna an la siam theih loh avangin Greece hian fund a hmuh thar tur tam tak a hloh phah tawh a ni. Sum lamah harsatna a tawk mek a, ram chhunga bank-te chu khar niin, mipuiin ni khata sum an lakchhuah theih zat pawh bithliah an ni bawk.
PM Tspiras chuan a duh lo lamah mipuite vote a tlak ṭhat chuan an leibatna ramte nen inremna ṭha zawk an siam theih a beisei thu a sawi. "Yes ti lam an chak a nih chuan, bank-te chu inremna thuthlung hnuaiah hawn a ngai tawh dawn a ni. Mahse hei hi Greece mipuite duh dan a nih zawk chuan, an duhthlanna chu kan zahsak zel sang," a ti. 'No' ti lam an chak a nih erawh chuan, vote thlak tukah Brussels-ah amah ngei chu kalin, inremna ṭha zawk an siam ngei a beisei thu a tarlang.
Hetihlai hian eptu lam chuan mipuite chu Eurozone ruahmanna siamte hi thlawp turin an ngen thung. Prime Minister hlui Costas Karamanlis chuan PM Tspiras ngaihdan chu a dik lo a ni tiin, 'No' ti lam an chak chuan Europian Union aṭangin an chhuah a ngai dawn a ni, a ti.
International Monetary Fund (IMF) chuan Greece hian sum lama harsatna an tawh mekte siamṭhatna turin kum thum chhung atan dollar tluklehdingawn 55 vel a mamawh dawn tih a sawi. Greece hian IMF laka a leiba, euro tluklehdingawn 1.5 chu a pek tlak a hun tawh a, mahse a sum bat hi tun thlengin a la pe thei lo a ni.
Leiba euro tluklehdingawn 323 a nei mek a, heng zinga 60% hi Eurozone laka a bat niin, IMF lakah 10% leh European Central Bank lakah 6% te ba tel bawk.