Russia-in Ukraine hnena gas hralh a titawp rih

Russia gas firm, Gazprom chuan Ukraine hnena gas a supply chu a man chungchangah inbiak remna an neih theih loh avangin a titawp lailawk.

Ukraine sorkar hnuaia energy firm, Naftogaz chuan Russia hnen aṭanga gas a lei ṭhin chu a titawp rih dawn tih a sawi a, hemi hnu hian Gazprom pawh hian supply tihtawp a tum thu a sawi.

European Union kaihhruai hnuaiah Russia leh Ukraine hian gas supply chungchangah hun rei tak inbiakna an neih tawh a, mahse inremna an siam thei lo.

Gazprom chuan Ukraine hian July thlaa gas a supply na tur man a pek lawk theih loh avangin an pe chhunzawm thei rih lo tih a sawi. CEO Alexei Miller chuan, "Ukraine hian gas man hi a pek lawk loh chuan Gazprom-in a supply chhunzawm lo ang," a ti.

Tun ṭum hi Russia-in Ukraine hnena gas supply a tihtawp ṭum hnihna a ni. Kum 2014 June thla khan Russia thlawp, Ukraine khawchhak lama hel leh Ukraine sorkar inkara buaina vangin gas pek hi a lo titawp lailawk tawh bawk. Hei bakah hian Russia nena inzawmna ṭha tak nei, Viktor Yanukovych chu Ukraine president aṭanga paihthlak a ni a, hemi hnu hian gas man hi a tisang bawk.