Boko Haram-te'n mosque-ah mi 97 kaphlum

Nigeria helpawl, Boko Haram-te chuan an ram hmarchhak lam, Ku­kawa mosque-a ṭawngṭaina hun hmangtu mi 97 an kaphlum.

Helho hian Nilaini zan khan Kukawa khua hi an bei a, Mus­lim-te thla thiang­hlim, Rama­dan thla serha mosque-a ṭawng­ṭaite an bei zui nghal bawk.

Mosque bakah chen­na-in hrang hrang pawh lutin an bei zui bawk a, an mi thah zingah hian hmeichhia leh naupangte pawh an tel.

Kukawa khua hi hmar­chhak biala khawpui lian ber, Maiduguri khua aṭanga mel 110 vela hla a ni.

Boko Haram-te hian a hmain Mussaram thing­tlang khua pawh an lo bei tawh bawk. Khaw chhunga mite chu hmei­chhia leh mipate dah hrangin, mipa an dah­khawmte chu an pawng­kah a, mi 40 chuang an kaphlum.

Nigeria vice-president Yemi Osinbajo chuan an ram hmarchhak lam bial hi a fang mek a, Boko Haram-te pawikhawih chu a dem thu sawiin, sor­kar chuan helte hi theihtawpin a bei let zel dawn a ni, a ti.