NKorea tuilian vanga thi 133 an tling tawh

United Nations chuan North Korea rama tuilian vanga thi chu mi 133 an tling tawh a, chin hriat lohin mi 395 an awm mek bawk niin a sawi. Tuilian vang hian mi sang telin in leh lo an chan.

UN Office for the Coordination of Humanitarian Affairs (OCHA)-in Pathianni-a thuchhuah a siamah chuan tuilian hian in 35,500 a chim tawh a, heng zinga 69% chu awm zui tlak lohin an chhia a, public bulding 8,700 pawh tuilian vang hian a chhe bawk. Thlai chinna ram acre 39,540 a chim a, tuilian tuar mi 140,000 te chuan ṭanpuina an mamawh hle a ni, a ti.

OCHA chuan UN agency, international NGO, international Red Cross leh North Korea Red Cross aiawhte chuan tuilenna hmun hi kar kalta khan an tlawh tih a sawi bawk. Tuilian tuarte tan hian ei tur, awmna tur leh choka bungrua bakah tui thianghlimte an sem.

NKorea sorkar chuan kawngpui siam hna a thawk mek a, chhawmdawlna pawh a sem bakah in sakna tur hmanruate pawh a pe tel bawk. Thlasik a lo thlen hma ngeiin chenna in 20,000 sak hman a tum a ni.

Leilung chhiatna, a bikin tuilian hi NKorea hian tuar fo a, kum 2012 khan tuilian vangin mi 169 in nunna an lo chan tawh a ni. Tuilian hian thlai chinna ramte a chim nasat ṭhin avangin ei leh bar lam thlengin a nghawng a ni. UN Food and Agriculture Organization chuan ei leh bar lam an indaihlohna a la nasa chho zel dawn niin a sawi.

Hetihlai hian NKorea sorkar chu nuclear test nei leh turin a inbuatsaih leh mek niin South Korea chuan a sawi. SKorea Defence Ministry thupuangtu, Moon Sang-kyun chuan, NKorea hi a nuclear test-na hmun, Punggye-ri aṭanga nuclear test nei leh turin a inpeih reng tawh a ni, a ti. Nuclear test a lo neih tawhte chu Punggye-ri
aṭang vek hian a ni.

Pathianni khan NKorea Foreign Ministry thupuangtu chuan an ram economy hmasawnna tura an thawh bakah, nuclear ralthuam siam chhunzawm zel an tum tih a sawi. US leh ramdangten nuclear chungchanga an vau leh hrek tumna avangin ti lo thei lo dinhmunah an dah zawk tih a sawi bawk.