Brazil Congress-in ex-speaker Cunha ban

Brazil parliament lower house, Congress chuan Speaker hlui Eduardo Cunha chu Congress member a nihna atangin a ban.

Eduardo hian Swiss bank account neiin, sum tam tak a chheprelh nia puhna chu thu dik lo niin a ṭang a, mahse Switzerland thuneitute thu zawh an nih hnuin account hi a lo nei ngei tih finfiah a ni. Hei vang hian a thiltih dan hi eirukna chi khatah puhin Congress member a nihna aṭangin ban a ni ta a ni.

Brazil president hlui Dilma Rousseff-i ban a nih theihna tura hma la tu ber, Cunha hi thubuai siamsak a nih bakah man pawh a tawk maithei nia sawi a ni. Thawh
ṭanni-a Congress-a a chungthu ngaihtuahnaah, Cunha chuan Pre≠sident hlui Rousseff-i thlawptute chu a laka phuba lak tumah a puh.

Cunha hi Supreme Court chuan state oil company lian, Petrobas nena contract siam chung≠changah thamna dollar maktaduai tel laah puhin a chhui mek bawk. Petrobas-a eirukna lian tham tak thleng avang≠in company hian dollar tluklehdingawn 2 vel a hloh phah a, he thilah hian sumdawng lian leh roreltu eng emaw zat inhnamhnawiha puhin man an lo ni tawh bawk.

Thu zawhfiahnaah sumdawng lian pathumte chuan contract an hmuh theihna atan hian Cunha hi thamna an pe ngei a, ram pawn lama a account-ah pawisa hi an thun niin an sawi.

Kum 2015 March thla khan Cunha chuan ramdanga sum chheprelha an puhna chu thu dik lo a nih thu leh, a income tax-a a tarlan bak account dang a neih loh thu a lo sawi tawh a ni. Mahse Switzerland thuneitute chuan eirua puh a nihna chungchang chhuitute hnenah Cunha leh a nupui Claudia Cruz-te chuan secret account neiin, dollar maktaduai nga an neih thu an hrilh a ni.