Syria sipaiten inkahhai puang

Syria sipai-te chuan Thawhṭanni aṭang khan ram pumah ni sarih chhung inkahhai an puang.

Inkahhai hi Thawhṭanni zan dar 7 aṭanga ṭanin, September 19 thleng hman a ni dawn tih sipai thuchhuah chuan a tarlang. Hemi rual hian inkahhai puan chhunga dan bawhchhe zawnga che helho chu beihlet an ni dawn tho tih a sawi nghal bawk.

Syria President Bashar al-Assad-a paihthlak tuma helte pawhin thuchhuah an siam a, inkahhai puan a nih dan chu thlawp vek lo mah se an zawm dawn tih an sawi. Helpawl thuchhuah chuan, inkahhai puan leh tualchhung indo tuarte tana chhawmdawlna pek chu an hnial lo tih an sawi a, mahse inkahhai puanna thuthlunga bithliah siam a nih dan erawh chu ṭha an ti lo tih an sawi.

Russia chuan President Assad-a hi a thlawp a, helho laka beihpui a thlaknaah pawh a pui a ni. Hetihlai hian US chuan President Assad-a paihthlak tumtu hel ṭhenkhat chu a thlawp thung.