MP a nihna aṭangin Cameron a bang

Britain Prime Minister hlui David Cameron chuan Thawhṭanni khan Parliament member a nihna aṭanga a ban thu a puang.

Kum 49 mi, Cameron hi kum 2015 inthlanpuiah an party, Conservative Party chu chakin Prime Minister atan lakluh a ni a, mahse kumin June thlaa Britain mipuite ngaihdan lakah khan a ngenna hnawl a, European Union aṭanga inlakhran duhtu lam an chak tak avang khan PM a nihna aṭangin a lo bang tawh a ni.

Cameron-a thlaktu atan hian Theresa May-i chu PM atan lakluh a ni a, Cameron chuan a theihtawp≠a a thawhpui zel tur thu a sawi.

PM aṭanga a ban hnu thla hnihah Cameron chuan MP a nihna pawh a bansan leh ta a ni. Thawh-
ṭannia a thutlukna a puanah hian hemi chungchang hi ngun taka a ngaihtuah thu a sawi a, PM hlui ni chunga chanvo pawimawh engmah chelh lo, backbench MP nih reng chu thil harsa tak niin a sawi.

Cameron hi Witney constituen≠cy MP a ni a, he bialah hian kum 2001 aṭang khan thlan tlin a ni tawh. Kum 2005 khan Conservative Party hruaitu niin, kum 2010 khan Liberal Democrats nena ṭangrual sorkar an siamah PM atan lakluh a ni a, kum 2015 inthlanpuiah khan an party hi party mala sorkarna siam thei turin a chak a, PM term hnihna a chelh chhunzawm leh a ni. Cameron hian PM hna hi kum ruk chhung a chelh hman a ni.