SKorea eptu party-te'n THAAD dah an duh lo

South Korea leh US-in Korea ram pahnihte inrina bul, South Korea ram lamah US missile shield, Terminal High Altitude Area Defense (THAAD) system dah an tum chu South Korea-a eptu party-te chuan an duh lo.

Thawhṭanni khan party lian pathum hruaitute chuan President Park Geun-hye-i hmuin darkar hnih chhung an inkawm. He meeting-ah hian rorellai Saenuri Party chairman Lee Jung-hyun, eptu party Minjoo Party chairwoman Chho Mi-ae leh People's Party hruaitu Park Jie-won te bakah, presidention security advisor Kim Kwan-jin, foreign affairs leh unification minister-te an tel.

Eptu party hruaitute chuan South Korea rama THAAD system dah tum chu an duh lo thu an sawi a, President hnenah hian US missile system hian nuclear hmanga North Korea-in an ram a beihna tur lakah a venghim thei dawn chuang lo tih an sawi. North Korea sorkar chu inremna kawng zawnga inbiakna neihpui tura an duh thu an sawi bawk.

SKorea leh US chuan July thla khan South Korea ram chhimchhak lamah kumin chhung ngeia THAAD system dah an lo remti tawh a, hei hi China leh Russia chuan na takin an sawisel a ni.