Joe Biden-a'n Covid vaccine la

US president-elect Joe Biden chu an ram huna Thawh­ṭanni khan Covid-19 vaccine pek a ni a, vaccine pek lai hi TV-ah tihchhuah a ni. 

Kum 78 mi, vice presi­dent hlui Biden hi Pfizer/BioNTech coronavirus vaccine pek a ni a, kar thum hnuah jection leh tur a ni ang. Biden bakah a nupui, Jill Biden pawh vaccine hi pek a ni bawk. 

Newark, Delware-a Christiana Care Hospital-ah Biden hian vaccine hi a la a, vaccine siamna kawnga thawktue chungah lawmthu sawiin, hri leng dokna kawnga front­line worker-te chu an thawh­rimna avangin lawmthu a hrilh bawk. Biden hi a kum a upat tawh avangin high-risk age category-ah a tel a ni. 

Vice president Mike Pence leh second lady Karen Pence bakah surgeon general Jerome Adams-te pawhin Covid-19 vaccine hi an la tawh a ni. Vice president-elect Kamala Harris leh a pasal chuan kar leh lamah an la ve thung ang. 

US-ah hian kar liam ta aṭang khan Pfizer/BioNTech vaccine hi health care worker-te hnenah pek ṭan a ni a, state 50-ah he vaccine hi semchhuah a ni tawh. US Food and Drug Administration (FDA) chuan Moderna Covid-19 vaccine pawh emergency atana hman turin a pawm tel tawh bawk a, hei pawh hi state hrang hrangah sem chhuah ṭan a ni tawh.

Sorkar chuan tun kar chhung hian Pfizer/BioNTech vaccine dose makta­duai hnih leh Moder­na vaccine dose maktaduai 5.9 semchhuah hman a tum.