UK-a hri chi thar thunun theih loh a la ni lo: WHO
World Health Organization (WHO) chuan Thawhṭanni khan thuchhuah siamin United Kingdom-a Covid-19 chi thar hmuh chhuah chu thunun theih loh a la ni lo tih a tarlang.
WHO emergency chief Michael Ryan chuan hmun dangah pawh hri kai an pun chak zawkna hmun a awm nual tih sawiin thunun theih ṭhin a nih thu a sawi a, chumi a nih avang chuan UK-a hri thar hmuh pawh chu thunun theih loh a la ni lo tih a sawi rualin ngaihthah chi erawh a ni lo, a ti. UK-a hri chi thar an hmuh chhuah hi VUI-202012/01 (the first Variant Under Investigation in December 2020) tih a ni a, September thla laihawl vel aṭang khan London leh Kent velah hmuh ṭan niin, a darh chak hle. Covid-19 hri pangngai ai khan a darh chak zawk a, chutih rual erawh chuan a hri a chak lo deuh zawk niin mithiamte chuan an sawi thung.
Hri chi thar a len avang hian Europe ram hrang hrang leh ram dang eng emaw zat chuan UK nena inkalpawh an khap nghal a, India ram pawhin Thawhṭanni aṭang khan UK nena thlawhtheihna hmanga inkalpawhna chu kumin chhung aṭang an titawp lailawk a ni.Hetihlai hian Thawhṭanniah khan Australia chuan an ramah pawh hri chi thar kai hi pahnih an awm tawh tih an tarlang ve bawk a, hri kai thar paruk Sydney-a Pathiannia awm zinga pahnih chuan hri darh chak chi zawk hi an kai tih an sawi.
SAfrica flight ram pangain titawp lailawk tawh
South Africa-ah pawh virus chi thar a awm nia report a awm avangin nimin thleng khan ram panga chuan an ram nena thlawhtheihna hmanga an inkalpawhna chu an titawp lailawk nghal.
Germany, Turkey, Israel, Switzerland leh Saudi Arabia-te chuan SAfrica-a SARS-COV-2 virus chi thar 501.V2 Variant a leng nia report a awm avangin Thawhṭanni aṭang khan an ram leh SAfrica thlawhtheihna hmanga inkalpawhna chu an titawp a ni.
Hri thar hi Eastern Cape-ah hmuh chhuah niin Kwazulu-Natal leh Western Cape-ah pawh kai an awm nual tawh nia tarlan a ni.