Supreme Court-ah Brazil President hlui Bolsonaro puhna thehlut

Brazil president hlui, Jair Bolsonaro chu an ram chief prosecutor chuan kum 2022 president thlana a chak loh hnuah sorkar thar paihthlak tuma puhna chu Supreme Court-ah a thehlut.

Kum 69 mi, Bolsonaro hi inthlana a hneh tak loh, Luiz Inacio Lula da Silva-a'n President Office a luah tur dan tum nia puh a ni. Heng puhna hi Supreme Court chuan a ngaihtuah dawn a, a pawm chuan Bolsonaro leh mi dang 33 te chu thubuai siamsakin, an chungthu ngaihtuah a ni ang.

Bolsonaro erawh chuan tih dik loh engmah a nei lo a, politics-a inbeihna mai niin a sawi thung.

Kum 2022 inthlana electronic ballot hmante chu khawih chingpen awlsam tak nia sawi a, Luiz Inácio Lula da Silva a hneh loh a pawm duh loh avangin democracy kalphung ngai pawimawh loa puhin, Bolsonaro hi kum riat chhung politics khel thei lo tura hrem a lo ni tawh bawk.

Bolsonaro hian President inthlana a chak loh hi a pawm duh loh hnuah, President thar lak luh a nih hmain Brazil chhuahsanin US a pan zui a ni. Kum 2023, January 8 khan Bolsonaro thlawptute hian an ram khawpui, Brasilia-a sorkar bulding hrang hrang an bei zui a, buaina siamtu zinga mi 15,00 chu police-ten an man a ni. Thla thum hnua police report tih chhuah chuan he buaina chhuakah mawphurhtu berah Bolsonaro chu puhin, tharum hmanga sorkar thar paihthlak a tumah an puh a ni.