IS-te'n Syria sipai 25 tihhlum lai video tichhuak

Islamic State (IS) firfiak pawl chuan hman­lai thil hlu tak tak awmna khawpui, Palmyara-a amphitheatre-ah Syria sipai an man zinga 25-te an kahhlum lai video an tichhuak.

Video an tihchhuaha sipaite an kahhum hun hi May 21 a ni. IS mi leh sa tam takin an thlir laiin, sipaite hi amphitheatre stage-ah kah­hlum an ni. Sipai kaphlumtute hi mipa naupang leh rawlthar te an ni a, a lo thlirtu zingah hian naupang eng emaw zat an awm bawk.

IS hian May thla laihawl vela Syria khawpui pawimawh tak, Palmyra a lak hnu hian he khawpuiah hian mi 200 chuang a tihlum tawh. Hei bakah hian khawpui chhunga hmanlai thil hlu tak tak eng emaw zat a tichhe tawh bawk.

Palmyra khawpuia hmanlai thil hlu zing­ah amphitheatre hi a tel a, he hmun hi UNESCO World Heritage Site-ah pawh telh a ni. IS-te hian theatre hi an la khawih chhe lo nia hriat a ni a, mahse khawpui chhunga Muslim ho thlanmual pawimawh tak leh, Palmyra Museum pawna milim te chu an tichhe tawh a ni.

Hetihlai hian US kaihhruai ṭangrual pawlte chuan Syria leh Iraq rama IS hmun pawimawhte Pathianni khan thlawhtheihna hmangin an bei chhunzawm leh. US official-te chuan Pathianni khan firfiakte hmun pawimawh 16 vel an tihchhiat thu an sawi a, heng zingah hian Syria rama firfiak pawlte inkalpawhna kawngpui te a tel. IS firfiak 15 vel an thih bakah, mi dang tam takin hliam an tuar bawk niin a sawi.

Ṭangrual pawl, Combined Joint Task Force chuan beihpui an thlaknaah hian IS firfiakte'n ralthuam leh mamawh an lakluhna kawng leh an awmna bial tihchiatte chu an tum ber a ni, a ti.

IS hian May thlaa Palmyra khawpui an lak hnu khan Syria ram zahve dawn chu an thununna hnuaiah an dah tawh a ni.