Malaysia Prime Minister account chhui chiang dawn

Malaysia Prime Minister Najib Razak-a personal bank account-ah sorkar fund dollar maktaduai 700 dah nia sawi chungchang chu special task force in a chhui chiang dawn.

Attorney-General Abdul Gani Patail chuan PM personal account-a sorkar sum dah luh nia sawi hi Central Bank-a Anti-Corruption Commission leh police-te'n an chhui dawn tih a sawi. Pawisa chhungluttu nia sawi, company pathum document pawimawhte pawh an enfiah mek niin a sawi.

PM Razak hian eirua an puhna chu thu dik lo a nih thu sawiin, politics lama amah tihchhiat tuma beihna a ni, a ti.

Deputy Prime Minister Muhyiddin Yassin pawhin PM puh a nih dan chu chhui chiang ngei turin thuneitute a phut a, "Hetianga inpuhna hian PM dinhmun leh zahawmna hi a tichhe vek thei a ni," a ti. An puhnate hi a dik lo ngei a nih chuan, PM chuan he thu sawichhuaktute chungah action la ngei se a duh thu a sawi bawk.