Tunisia President-in emergency a puang

Tunisia President Beji Caid Essebsi chuan an ram chu dinhmun harsa takah a ding mek tih sawiin, Inrinni khan ni 30 awh emergency a puang.

President Essebsi chuan emergency hi 1978 law behchhana puan a ni tih sawiin, a ṭul dan a zira pawhsei theih a nih thu a sawi nghal bawk.

Essebsi chuan kum 2010 leh 2011-a an rama sorkar laka lungawi lohna lantirna nasa tak a thlen avang khan, sorkar chuan kawng hrang hrangin harsatna a tawk chho tih a sawi. Khawtlang boruakin ngai a la awh chho thei lo a ni.

Emergency dan hnuaiah hian interior minsitry leh sor­kar chu curfew puan phalsak an ni a, thupek tichhuak hmasa kher loin mi an man thei a, media-te thuchhuah tur an hrek theih bakah, nawrh huaihawt pawh an khap thei dawn a ni.

President chuan, "Tunah hian Tunisia mi hna nei lo 600,000 vel an awm a, an zinga ṭhenkhat chu kum nga chhung hna thawh tur nei lo te an ni tawh a ni," a ti. An rama khawtlang boruak ṭha lo avangin foreign investor, Tunisia rama euro maktaduai 557 project siam tum pawhin an ṭhenawm ramah project hi a siam ta zawk tih a sawi bawk.