Japan PM hlui Kishida beitu kum 10 tang turin hrem

Japan court chuan kum 2023-a an ram prime minister hlui, Fumio Kishida beitu, kum 25 mi Ryuji Kimura chu kum 10 tang turin a hrem.

PM hlui Kishida hi kum 2023, April 15-a Japan ram khawthlang lam, Wakayama-a inthlan campaign a neih laiin Kimura hian tualchher pipe bomb hmangin a lo bei a ni. Kishida hi vanneihthlak takin a na lo a, mahse mi pahnih erawh chuan hliam na vak lo an tuar a ni. A thiltih avang hian Kimura hi thubuai pali siamsak a ni a, heng zingah hian tualthah tuma puhna pawh a tel.

Wakayama District Court chuan kum 2023, April 15 khan tualthah tuma puhna thubuaiah Kimura hi thiam loh a lo chantir tawh a ni. Prosecutor-te chuan kum 15 tantir turin an phut a, mahse Kimura defence team lam chuan Kishida thah tuma bei a ni lo tiin an ṭang ve thung. Hemi hnu hian, Nilaini khan court chuan hremna tur hi ti chhuakin, kum 10 tang turin a ti ta a ni.

Kimura hian PM hlui a beihna chhan hi a sawi lo a, mahse report chuan an ram inthlana chuh tumte tana kum bithliah leh sum, yen mtd 3(USD 19,700) tal nei tura tih chu a duh lo niin an tarlang. Japan danah chuan Parliament upper house inthlana chuh tumte chu kum 30 leh, lower house inthlana chuh tumte chu kum 25 an tling tur tih a ni.