Sai rual sut vangin Sri Lanka rel chesual

Sri Lanka-a khualzin phur rel chu nimin, February 20 zing khan sai rual a sut vanga chesualin a let. Rel-a chuang zingah hliam na an awm lo a, sai erawh paruk an thi a ni.

He rel hian Sri Lanka khawpui, Colombo khaw-chhak lam km 180 vela hla, Habarana-a wildlife reserve-a tlan laiin zing khawvar hma deuhin kawng kanna laia sai rual lo awm chu a su a ni. Sai paruk an thih bakah pahnih an hliam a, enkawl nghal an nih thu wildlife thuneitute chuan an sawi.

Sri Lanka ramah hian sai hi 7,000 vel awma ngaih a ni. Sai hi humhalh niin sai thah leh tih nat chu pawikhawihna anga ngaih a ni. Hetih lai hian sai leh mihring inbeihna hi a thleng fo a, khawvelah pawh a thlen tamna ram niin, nikum khan hetianga inbeihna thleng vang hain mihring 170 leh sai 500 dawn an thi a ni. Ram ngaw a chereu zel avangin sai hi mihringte chenna hmunah an lut nasa chho tawh hle niin an sawi. Hei bakah kumtin relin a sut vangin sai 20 vel an thi ziah niin tualchhunga media-te chuan an tarlang.