Pope Francis-a'n hma a sawn hret

Roman Catholic kohhran hruaitu, damdawi-ina enkawl mek Pope Francis chuan hma a sawn ve hret niin Vatican chuan a sawi. Pope hi nimin khan damdawi-ina ni ruk a awmna a ni tawh a ni.

Kum 88 mi, Pope Francis hi kar liam ta khan thawk lama harsatna a neih avangin Rome-a Gemelli hospital-ah dah luh a ni a, damdawi-in a luh hnuah a chuapah pneumonia a kai ve ve tih hriatchhuah a ni.

Nilaini khan Italy prime minister Georgia Meloni chuan Pope hi a kan a, hmuh a nuamin fiamthute pawh an sawidun niin a sawi. Italy sorkar leh an ram mipuite aiawhin dam ṭha leh thuai turin duhsakna a hlan.

Vatican chuan Pope hi a khum aṭangin ṭho chhuakin ṭhuthlengah pawh a ṭhu peih a, hna ṭhenkhat pawh a la thawk thei niin a sawi. Pope awmna damdawi-in kawtah hian amah duhsaktute tam tak kalkhawmin a tan an ṭawngṭai sak bawk a ni.

Vatican-in Pope hian hma sawn ve hret niin sawi mah se, Pope hian a hnaihvai takte hnenah tun ṭum chu a tuarchhuak thei lo mai thei tia a hrilh thu report ṭhenkhat chuan an tarlang. A vuina neih dan tur chu a ruka rehearsal neih a nih thu an sawi bawk. Kum 2023-a interview a neih khan Pope Francis hian pope tam zawk an phumna hmun, St Peter's Basilica hmunah ni loin, Rome-a Santa Maria Maggiore basilica-ah phum a duh thu a sawi.