Russia-in UN resolution a veto hmangin hnawl
Russia chuan UN Security Council-in nikuma Malaysia Airlines thlawhtheihna tlak dan chungchang chhuitu tur, international tribunal siamna tura draft resolution a siam chu a veto (thuneihna) hmangin a hnawl.
Nilainia meeting an neihah UNSC member 15 zinga 11 chuan resolution thlawp lamah an vote a, pakhatin a duh lo lamah vote in, member pathum an hai thung. Mahse hemi hnu hian permanent member zinga mi, Russia chuan thuneihna sang a neihna hmangin he resolution hi a hnawlsak a ni.
UN-a Russia palai, Vitlay Chrukin chuan, "UN hnuaia tribunal siam hi kan thlawp loh thu vawi tam tak kan lo sawi tawh a ni. He thil hi siam kher a ṭul lo," tiin, an hnawlsak chhan a sawi.
Kum 2014, July 17 khan Malaysia Airlines thlawhtheihna chu Ukraine khawchhak lam, Ukraine sipai leh inlakhran duha helho inbeihna bial chhungah a thlawh laiin kah thlak a ni. He thlawhtheihna hi Netherlands khawpui, Amsterdam aṭanga Kuala Lumpur, Malaysia pana thlawk a ni. Thlawhtheihna kah thlak a nih avang hian a chuang, mi 298-te chu an vaiin an thi a ni.
Thlawhtheihnaa chuang thi zinga a tam zawk hi Netherlands mi an ni a, Australia mi 38 an awm bawk. Ukraine leh khawthlang ram eng emaw zat chuan thlawhtheihna hi Ukraine helhoin Russia siam missile hmangin an kap thla tiin an puh a, mahse hei hi helho leh Russia lam chuan an pha thung. Helho hian Ukraine sipaite kah thlak tiin a puh let ve thung a ni.
Netherlands, Malaysia, Australia leh khawthlang ramte chuan thlawhtheihna kah thlak a nih dan chhui tur hian tribunal din turin an nawr a ni.