Iran-in ralthuam a siam loh nan nuclear deal hi ruahman a ni: Kerry
US Secretary of State John Kerry chuan world power ram paruk leh Iran-in nuclear deal an siam tak chuan Iran-in nuclear ralthuam a siam tur a dang dawn a ni, tiin Congress-ah a sawi.
US Congress hian Iran nuclear deal chungchang hi ngaihtuah ve lehin, a taka kalpui tur chuan a pawmpui ve leh phawt a ngai dawn a ni.
Iran nuclear deal hi a taka kalpui a nih dawn chuan US-in Iran a hreknate hlih a ngai dawn a, hei vang hian Republican member
ṭhenkhat chuan an sawisel a ni. Israel pawhin nasa takin a lo sawisel tawh bawk a, khawthlang ramte'n Iran an hrekna hi an hlih chuan, nuclear ralthuam siam turin kawng an hawnsak zawk dawn niin a sawi.
Republican senator-te chuan Iran hrekna na zawk siam an duh a, mahse US President Barack Obama chuan Congress-in Iran nuclear deal dan a tum a nih chuan a veto hman a tum thu a sawi. President-in a veto a hman theih lohna tur chuan House of Representative leh Senate-ah deal dodalna hi member hmun thuma ṭhena hmun hnihin an thlawp a ngai dawn a ni.