Ruihhlo tawlh ruk veng turin venhimna ti khauh dawn

Tunlaiin Southeast leh East Asia ramah ruihhlo, methamphetamine tawlhruk a hluar sawt hle. Hei vang hian China, Myanmar, Laos leh Thailand-te chuan ruihhlo tawlhru ṭhinte manchhuak tur leh veng turin khauh zawka hma lak an tum.

Ram palite hian Guan Lei (China), Muang Phong (Myanmar), Muang Mom (Laos) and Chiang Rai-a Chiang Saen lawng chawlh hmun pan tur lawngte chu uluk zawka dap leh ven an tum a, August thla aṭang hian hma a la ṭan nghal ang.

Damdawi tawlhruk ven hna hi khawmual lamah beih ngawrh a ni ṭhin a, Mekong lui kaltlanga hian lawng hmanga tawlhruk a nih ṭhin avangin tuipui lamah pawh uluk zawkin venhim hna thawh a ni ang.

Methamphetamine (Meth) hi Myanmar aṭangin Thailand-ah an tawlh lut nasa hle a, Thailand-ah chuan he damdawi hi 'yab' emaw 'crazy medicine' tia sawi a ni. Thailand official-te chuan Myanmar sorkar chu a ram chhunga ruihhlo siamna hmunte dapchhuah kawngah a pui dawn a, China pawhin hmanruate pein, ruihhlo siamtute chungchanga hriat a neihte pawh a hrilh zel bawk ang.