Israel PM-in West Bank-a in 300 sakna tur a pawm

Israel Prime Minister Benjamin Netanyahu chuan an ram luah, West Bank-a Beit El-ah Juda-te chenna-in 300 sakna tur a pawm.

Israel sorkar chuan Nilaini khan thuchhuah siamin, prime minister office nena an sawiho hnuah, Beit El biala in 300 sak nghalna tur hi pawm a ni, a ti. Hei bakah hian East Jerusalem-a in 504 sakna tur ruahmanna pawh pawm a ni bawk tih a tarlang.

Thuchhuah chuan kum thum liamta khan in 300 sa tur hian sorkarin thu a lo tiam tawh tiin a sawi.

Palestine Liberation Organisation official chuan Israel sorkarin in sak thar a tum chu a dem thu leh, an inkara inremna siam tura hma an lak mekna tihchhiatna a ni, a ti.

United Nations, European Union leh United States-te pawhin Israel sorkar thutlukna hi an dem thu an sawi.

UN hotu Ban Ki-moon chuan, "International law hnuaiah midangte ram luah chhunga chenna-in sak tum hi dan kalh a ni," a ti. Israel leh Palestinian inremna siamna tur a dal thei a ni a ti. EU thupuangtu pawhin Israel sorkar thiltih chu ṭha a tih loh thu a sawi a, US State Department thupuangtu Mark Toner chuan inremna siam an tumnaah Israel chu thil ti tak tak lo anga ngaih a awl hle tiin a sawi bawk.

Hetihlai hian Israel sorkar chuan in sak a tumna, Beit El leh East Jerusalem-te chu inremna an siam a nih pawhin Israel ram a ni chhunzawm zel dawn tih a sawi. Israel hian West Bank leh East Jerusalem hi kum 1967 khan a la a ni.