Israel President hlui Shimon Peres-a nikhawhreloin awm

Israel President hlui Shimon Peres-a chu a stroke vangin damdawi-inah dah luh a ni a, dinhun a ṭha vak lo.

Shimon Peres hi Tel Aviv khawpui bula Sheba Medical Center-ah enkawl a ni a, doctor-te chuan nikhaw hre loa a awm thu sawiin, a dinhmun a ṭha lo hle niin an sawi. Kum 93 mi Peres hi khawl hmanga thawktir a ni bawk.

Kumin January thla khan Peres hi heart attack a neih avangin zai a lo ni tawh bawk.

Israel Prime Minister Benjamin Netanyahu chuan an ram mipuite chuan Shimon Peres-a chu an hmangaih a, a ṭhat chhuah leh nan an ṭawngṭai tih a sawi.

Kum 1948-a Israel independence/Jewish state din a nih aṭang khan Shimon Peres hian hruaitu hna pawimawh hrang hrang chu a chelh kim hman deuh thaw a, Israel secret nuclear programme duangtu ber a ni bawk.

Kum 2007-2014 chhung khan prime minister leh president hna a chelh a ni.

Israel leh Palestinian-te'n inremna siama inbiakna an neih theihna tura a hmalakna avangin, kum 1994 khan khawvel chawimawina sang, Nobel Peace Prize hlan a ni. He chawimawina hi hetihlai laia Israel Prime Minister Yitzhak Rabin leh Palestinian hruaitu Yasser Arafat-te nen an dawng a ni.

A kum upat hnuah a NGO din, Peres Centre for Peace hmangin ram tan theihtawpin a thawh chhunzawm reng a, Israel leh Palestinian inkarah boruak ṭha a awm theihna turin a bei zui reng a ni. Stroke a neih hma lawk hian a Facebook page-ah video dahin, an ram mipuite chu tualchhunga an thil siamchhuahte lei uar turin a ngen.