Hezbollah hruaitu Nasrallah vui a ni ta

Lebanon helpawl, Hezbollah hruaitu Sayyed Hassan Nasrallah chuan Israel beihpui thlaknaa a thih aṭanga thla nga dawn a liam hnu, Pathianni khan Beirut-a vui a ni ta.

Nasrallah hi nikum September 27-a Israel sipaiten Lebanon khaw daia Hezbollah hmun an beihnaah a thi a ni. Hezbollah dintu zinga mi niin, hruaitu dinhmun hi kum 30 chuang a chelh bawk. Israel-in beihpui a thlak lai hian Narallah hian bunker-ah an pawl commander-te meeting a neihpui lai nia sawi a ni.

Nimina a vuina inkhawm hi Lebanon-a sports stadium lian ber, Chamille Chomoun Sports City Stadium-ah neih a ni a, an pawl leh mi sate bakah ram hrang hrang aṭangin mi ṭhahnem tak an kalkhawm. Iran Parlkiament speaker Mohammad Bagher Qalibaf leh foreign minister Abbas Araghchi te pawh an tel a, Lebanon president leh prime minister aiawhte pawh vuina inkhawmah hian an tel a ni. Nasrallah vuinaah hian Iraq aṭanga kal duh an tuma vangin Iraqi Airways chuan flight pawh a tirh belh niin Iraq transportation ministry chuan a tarlang.

Nasrallah hi Lebanon chhim lamaa an khuaah phum a ni dawn nia sawi a ni a, a phumna hmun tur tak erawh puanzar a ni lo.