Brazil president hlui eiruk thubuai siamsak

Brazil President hlui, Luiz Inacio Lula da Silva, a nupui leh midang parukte chu sorkar enkawl oil company, Petrobas-a eirukna lian tham tak thlengah inhnamhnawiha puhin thubuai siamsak an ni.

Public prosecutor Deltan Dallagnol chuan Petrobas-a eirukna lian tak thleng vang hian company hian dollar tluklehdingawn 12.6 a hloh niin a sawi. Dallagnol chuan Petrobas-a eirukna lian tak thlengah hian Lula chu a hotu ber a ni, a ti. ìLula hian Petrobras-ah hian senior executive eng emaw zat a ruat a, eirukna hmangin anni hian ṭangrual sorkara political party telte tan sum an tuak a niî a ti.

Lula chuan an puhna chu thu dik lo a nih thu leh, thu dik tak pholang tura a beih let tur thu a sawi.

President hlui hian Petrobas-a contract hmuh theihna turin engineering and construction firm pakhat hnen aṭangin thamna atan Sao Paulo-ah in nuam tak a dawng nia puh a ni. Mahse Lula chuan he in, chhawng thuma sang hi a neitu a nih loh thu a sawi thung. An puhna hi thu dik a nih chuan man theih a ni ang.

Federal police-te chuan August thla khan prosecutor-te hnenah Lula leh a nupui te chu thubuai siamsak turin an lo nawr tawh. Police-te chuan Lula-te nupa hian builder OAS hnen aṭangin dollar 700,000 chuang an dawng niin an puh.

Lula hi kum 2003-2010 inkar khan Brazil President a ni a, kum 2018-a President thlanna chuh leh a tum thu a sawi. Mahse July thla khan Petrobas-a eirukna thleng chungchang chhuina dalah puhin thubuai siamsak a ni.