Ban Ki-moon-a’n Syria mipuite tan ngen sak

United Nations Secretary General Ban Ki-moon-a chuan Russia leh US chu Syria chung≠changa an inmil lohna te dah ṭha a, mipuite chhawmdawlna tur ṭha taka thawnluh a ni theih nana hma la turin a ngen.

Hun rei tak tual≠chhung indona a thlen hnuin, Syria sorkar leh hel pawlte chuan inkahhai an puang a, inkahhai puan anih hnua mipuite chhawmdawlna thawnluh tum chu Turkey ramriah an la tang a ni. Turkey ramriah hian mi 40,000 vel chhawmdawlna tur ei tur phurtu eng emaw zat an tang mek.

UN chuan hun rei tak helhoin an hrek beh tawh, Aleppo khawchhak lama chengte tana chhawmdawlna thawn luh chu thil pawimawh hmasa niin a sawi. Mahse sorkar leh helpawlte inkarah hian inhriatthiam lohna a awm vangin motor-te hi luh an la phal lo a ni.

Ban Ki-moon chuan Syria sokar thlawptu, Russia leh sorkar laka helte thlawptu US chu chhawmdawlna thawn luh chungchangah hma la a, thawkdun turin a ngen.

Syria sorkar chuan chhawmdawlna hi sorkar kaltlang emaw, UN kaltlang emawa pek chauh Aleppo-ah hian pek an remti tih a sawi. Aleppo khawchhak lamah hian mi 250,000 vel an la tangkhang mek a, inkahhai puan a nih hnuah boruak muanawm takin awm thei mah se, chhawmdawlna erawh an la dawng thei lo a ni.