Duterte-a'n mi 1,000 thahna thupek a siam niin puh

Philippines President Rodrigo Duterte chuan Davao City mayor a nih laiin mi 1,000 tihlumna tur thupek a tichhuak niin anmahni tihlumtu zinga pakhat chuan Senate a hrilh.

Davao Death Squad (DDS) chuan mayor Duterte thupek angin pawikhawihtu leh politics lama a hmelma, mi 1,000 te an tihlum ṭhin niin an zinga tel ṭhin, Edgar Matobato chuan Senate hmaah a sawi a ni. Matobato chuan amah ngei pawh mi 50 rukbo leh thahnaah a tel tih a sawi.

Matobato chuan an tihhlum zinga ṭhenkhat chu an ruangte an hal zui a, ṭhenkhat chu an ruang an chansawm bawk niin a sawi. Kum 2007 kha Davod del Sur province-ah tihhlum tura tih zinga pakhat chu awle ei tura an pek thu a sawi. "Kan hna ber chu ruihhlo zuar te, pawngsualtu leh rukrute tihhlum a ni" a ti.

Hemi rual hian an tihhlumte chu pawikhawihtu an nih vek loh thu a sawi. Duterte-a farnu ngaihzawng leh mayor chungchang sawiseltu broadcaster pakhat pawh an tihlum tel tih a sawi. Politics lama Duterte-a khingpui bodyguard pali pawh an that niin a sawi bawk. An zinga pakhat chu Duterte hian a kaphlum a ni, a ti.

Matobato chuan an hnathawh danah inthiam lohna a neih nasat avangin DDS chu a chhuahsan a, sorkar enkawl witness protection programme a zawm a, mahse kumin June thlaa president atana Duterte thlan tlin a nih avangin a nunna atana a hlauhthawn avangin a programme zawm pawh hi a chhuahsan leh tih a sawi.

Duterte hi Philippines President atana lakluh a nih hnuah an rama dan loa ruihho zuar leh ruihhlo hmangsualte lakah beihpui a thlak tir nghal a, mi 3,000 chuang tihlum an ni tawh nia sawi a ni.

Hetihlai hian Duterte-a thupuangtu, Martin Andanar chuan Matobato-a'n President a puhna chu thu dik lo a ni tih sawiin, "Hemi chungchang hi Commission on Human Rights chuan a lo chhui daih tawh a, eng thubuai mah siam a ni lo" a ti. Duterte-a fapa, Dadvao Mayor Paolo Duterte pawhin Matobato chuan a rinthu a sawi mai mai a ni tiin, mi a thusawi chu chhanlet tlakah an ngai lo tih a sawi.