China-ah thlipui tleh vangin mi 18 thi

China khawchhak lam, Fujian leh Zhejiang province-ah thlipui, Typhoon Meranti tleh vangin mi 28 an thi tawh a, chin hriat lohin mi 15 an awm mek bawk.

Typhoon Meranti hi kumina China rama thlipui tleh tawh zinga na ber a ni a, kum 1949 hnu lamah Fujian province-a thlipui tleh na ber a ni bawk.

Fujian flood control thuneitute chuan an province-ah thlipui tlehin chhiatna a thlen vanga thi chu mi 18 an ni a, mi 11 chu an chin hriat a ni lo tih an sawi. Thlipui tleh hian province chhim lama khawpui eng emaw zat a tibuai hle a, Xiamen, Quanzhou leh Zhangzhou khawpuiah pawh nunphung a tikhaihlak nasa hle.

Thlipui tleh vang hian Fujian province-ah chenna in 18,300 a chhia a, a thil tih chhiat hlut zawng hi US dollar tluklehdingawn 2.6 hu a tling.

Zhejiang province-ah pawh typhoon Meranti tleh vang hian mi 10 an thi a, chin hriat lohin mi pali an awm. Thlipui hian ruah a ken tel avangin hmun tam takah lei a min bakah tui lian bawhawk a thleng bawk niin Zhejiang provincial flood controal headquarters chuan a sawi. Zhejiang province-ah hian thlipui tleh vangin in 902 a chhia a, mi maktaduai 1.5 chuangin harsatna an tawh phah bawk.

China meteorological thuneitute chuan Typhoon Meranti tleh hnu hian Typhoon Malakas a tleh leh dawn tih an sawi a, ruah nasa taka sur tur thu pawh an sawi.