New York-a thil puakah mi 29 in hliam tuar

US-a New York khaw≠pui mipui lunna laiah Inrinni zan khan thil puakin, mi 29 in hliam an tuar a, mahse he thil hi tum reng vanga tihpuah ni mah se, firfiakte an inrawlh awm hriat a nih loh thu Mayor Bill De Blasio chuan a sawi.

New York-a Chelsea district-a thil tihpuah chhan hi hriat a la ni lo a, hliam tuar zingah ngaihtuahawm an awm lo. Mahse thil puak hi a na hle a, block eng maw zata hlaa awm pawn an hre pha a ni. A hnuah thil tihpuahna tura hman tum, pressure cooker-a wire leh mobile phone inthlunzawm pawh hmuh a ni leh bawk.

Khawpuia thil puah hun hi an ram sanaa zan dar 9:00 vel a ni a, bawlhhlawh bawm aṭanga puak nia hriat a ni.

Inrinni zan vek khan Minnesota state-a St Cloud-ah mi pakhat, private security uniform inbel chuan chem kengin shopping mall a bei a, mi pariat a vit a, pawikhawihtu hi police officer-in a kaphlum.

St. Cloud Police hotu Blair Anderson chuan hliam tuarte chu St. Cloudh Hospital panpui nghal an ni thu leh, an zinga pakhat admit a nih thu a sawi a, mahse a ngaihtuahawm lo niin a sawi. Shopping mall beitu hian Allah hming lamin mi ṭhenkhat chu muslim an nih leh nih lohte a zawt a, a hnuah a vit zui ta nia sawi a ni. Shopping mall-a police officer, a duty off laia lo awm ve chuan pawikhawihtu hi a kap hlum ta niin Anderson chuan a sawi.

New Jersey-ah pawh Inrinni khan charity run neih tur chu pipe bomb puak vangin ṭhulh a ni. US marine-te tana charity race neihna tur, Seaside Park-a Ocean Avenue-ah an tlan ṭan hmain bawlhhhlawm bawm aṭangin pipe bomb hi tihpuah a ni a, mahse hliam an awm lo. Charity race-ah hian mi 3,000 vel tlan an tum a ni. Official-te chuan he bomb hi tlan ṭan hnuah tihpuah tuma ruahman niin an saiw a, mahse an tlan hun tur an tihkhawtlai avangin tlan ṭan hmain a puak ta a ni. Bomb puahna bulah hian rucksack hmuh a ni bawk.