UN-in Syria vangin emergency session nei

United Nations Security Council chuan Syria ram dinhmun ngaihtuahin Inrinni zan khan emergency meeting a ko.

US kaihhruai ṭangrual ramten Syria sipai hmunte an beih hnuah, Russia chuan meeting ko tur hian UN a ngen a ni.

Russian Defence Ministry chuan Inrinni zing khan US kaihhruai ṭangrual ramte chuan Syria khawchhak lam, Deir al-Zour province chu ṭum eng emaw zat an bei a, Syria sipai 62 an thah bakah 100 chuangin hliam an tuar bawk niin a sawi. Indo thlawhtheihna hian Iraq ram lam aṭangin Syria hi a lut niin ministry thupuangtu, Maj Gen Igor Konashenkov chuan a sawi.

Hemi chungchang hi Pentagon chuan sawifiahin, "Ṭangrual sipaite chuan Islamic State (IS) firfiakte hmun an bei niin an inhria a ni" a ti. Mahse Russia-in Syria sipai leh an motor-te an kap tel nia an hrilh veleh an beihpui thlak pawh tihtawp nghal a ni, a ti.

UN-a US ambassador Samantha Power chuan he thil thleng chungchang hi an chhuichiang dawn tih a sawi a, Syria sipaite hmun an lo bei tel a nih chuan an tum a ni lo tih a sawi bawk.