UN-in raltlante chungchang ngaihtuah

United Nations General Assembly chuan nimin khan New York-ah khawvel puma raltlan leh pemte chungchangah summit hmasa ber a nei.

"Addressing Large Movements of Refugees and Migrants" summit-ah hian ram hrang hrang hruaitu an tel a, raltlan leh pemte dikna chanvo humhalh sak an nih theihna tura UN member ram 193-te thawhho dan turte an ngaihtuah.

Khawvel pumah raltlan maktaduai 21 chuang an awm mek a, Indopui II hnua an tam lai ber a ni. Raltlan zingah hian a zahve vel chu naupang an ni. Summit-ah hian heng ratlante harsatna tawh hrang hrang sutkian dan tur an ngaihtuah a ni. Anni bakah hian inhumhimna zawnga tlanchhia mi maktaduai thum leh, in leh lo tlanchhiatsana pemkual mi maktaduai 40 an awm bawk.

Kumin kumtir lam khan Ireland leh Jordan kaihhruaia inbiakna neihah raltlante harsatna chinfelna tur hian ruahmanna siam a ni a, mahse an rawtna siamte hi ram tam takin an zawm loh avangin awmzia a nei thui lo nia sawi a ni. Europe ram hrang hrangte chuan raltlan pung chak lutuk vangin an ramri te an khar a, ral tlan lakluh chungchangah pawh khuahkhirhna dan te an siam a ni.

UN chuan Europe in ramri a khar avangin Europe ram pana pem luh tum, mi 57,000 vel chu Greece rama camp 47-ah an tangkhang mek niin a sawi.