Pheikhawk hniam bun turin UK PM ngen

Britain Prime Minister Theresa May-i chu hnathawhnaa pheikhawk heel sang a bun ṭhin chu thlak a, pheikhawk flat bun turin ngen a ni.

Tun hnaia Brighton-a trade union's conference-ah hnathawhna hmuna hmeichhiate pheikhawk sang bun tir an nih ṭhin chungchang hi sawiho a ni. Societyof Chiropodists and Podiastrist hotu, Kate Collins chuan debate hi hawngin, " Hmeichhe puitling zinga 80% chuan ke lamah harsatna an nei a, hei hi an hnathawhna nghawng a ni. Hmun ṭhenkhatah chuan hnathawkte tan dress code an siam a, heng zingah hian pheikhawk sang telh a ni. Hnathawhna hmun pheikhawk sang bun reng hian a hnu lamah hriselna thlengin a nghawng pawi thei a ni" a ti.

Receptionist pakhat chu a hnathawhnaah pheikhawk sang a bun loh avangin tirh haw a ni a, hei vang hian hemi chungchang hi an sawiho zui a ni.

Trade union palai Penny Robinson chuan, "Hnathawhna hmuna pheikhawk bun hahdam zawk buna midangte tana entawn tur siam thei ram hruaitu kan nei tawh a ni. Theresa May-i prime minister a nih khan a policy, a ngaih pawimawh zawng leh Brexit chungchanga a hma lak zirchiannate chhiar leh hmuh ka lo inbeise a, mahse chanchinbu tam zawk chuan pheikhawk sang a ngainat thu leh, a pheikhawk nei zat tih vel ringawt an buaipui a ni" a ti. Media-te hnenah chuan an rama hmeichhe thiltithei berin designer shoe a mamawh kher lo tih lantir turin a ngen. Pheikhawk hniam bun tura ngenna, petition siamah hian mi 1,40,000 chuangin hming an ziak a ni.