South Sudan-ah raltlan maktaduai khat chuang tawh

South Sudan tualchhung indona thleng vangin raltlan an pung zel a, raltlan hi makta≠duai khat an chuang tawh niin UN refugee agency chuan a sawi.

Kumin July thla aṭang khan tualchhung indona avang hian himna zawnga ramdang tlanchhia, mi 1,85,000 an awm tawh a, an la pun belh zel a ni. Hei bakah hian an ram chhungah mi maktaduai 1.6 chu an tlanchhe bawk. Kum 2013, December thla aṭang khan chenna in nei lo hi an ram mipui 20% an tling tawh a ni.

July thlaa tualchhung buaina chhuak leh avangin ramdanga tlanchhia hi an pung nasa hle a, UNHCR thupuangtu Leo Dobss chuan, "Mipuiten boruak ṭha a awm ringa beiseina an lo neih ve te chu a chhe zo a, hei vang hian himna zawngin tlanchhia an pun phah ta a ni. Chhawmdawl hna thawktute tan pawh ṭanpui ngai mi tam takte hnena chhawmdawlna pek pawh a harsa hle a ni" a ti.

Sudan President Salva Kirr leh Vice President hlui Riek Marchar-a thlawptu sipai pawl hnihte inbeihna avangin kum 2013, December thla khan tualchhung indo hi a thleng a, kum 2015 Aguust thla khan ram dangte nawrna avangin inremna siam mah se, a hnu thla thum lekah an inbei zui leh a ni. Hei vang hian Machar pawh ramdangah a tlanchhia a, vice president atan hian an party member pakhat chu ruat zui a ni a, mahse hei hi Machar chuan a pawm lo tih a sawi.