US senator-te'n NKorea hrekna na zawk siam turin ngen

US Senator 19 chuan President Barack Obama hnenah lehkha thawnin, North Korea ram hrekna na zawk siam tur leh, NKorea ram thlawptu China-a pawl ṭhenkhatte blacklist-a dah bawk turin an ngen.

Senator Cory Gardner kaihhruai≠in senator rualte hian kar kalta khan President Obama hi lehkha an thawn a, North Korea-in nuclear leh ballistic missile programme lama chak taka hma a sawn zel chu US himna atan pawh a hlauhthawnawm niin an sawi.

South Korea-a Terminal High Altitude Area Defense (THAAD) system dah an tum pawh chak taka hma la tura ngenin, NKorea do let turin US, Japan leh Soth Korea-te inkarah thawhdunna ṭha leh chak zawk siam turin an ngen bawk.

Senate Foreign Relations Subcommittee on East Asia chairman Gardner hi January thlaa NKorea-in nuclear test a neih leh, February thlaa long-range rocket a kahchhuah avanga US-in a hrekna tur, North Korea Sanctions and Policy Enhancement Act of 2016 ziaktu ber a ni. He hrekna hi kumin March thla aṭang khan hman a ni.

Pathianni kha US, Japan leh South Korea foreign minister-te chu New York-ah inhmuin, NKorea-in a ṭum ngana atana nuclear test a neih leh vanga hrekna na zawk siam dan turte an sawiho. U.S. Secretary of State John Kerry, Japan Foreign Minister Fumio Kishida leh South Korean Foreign Minister Yun Byung-se-te hi NKorea-in UN hrekna palzuta September 9-a nuclear test a neih leh hnua an inhmuhkhawmna hmasa ber a ni. New NYork-a UN General Assembly neih mekah pawh NKorea chungchang hi sawiho a la ni dawn bawk.

Minister-te chuan thuchhuah in-ṭawm siamin, NKorea-in UN resolution a siam ngaih pawimawh loa missile leh nuclear programme a kalpui chhunzawm zel chu an dem thu an sawi a, he programme hi titawp tura na zawka nawr a ngai tih an sawi.