Syria-ah chhawmdawlna phurtu motor bomb

Syria sorkar leh helte'n kar khat chhung inkahhai an puan chu Thawhṭanni tlai khan a zo a, an inremna siam a tawp rual hian Aleppo khaw bulah beihpui thlak chhunzawm nghal a ni a, chhawm≠dawlna phurtu motor pawh kahfuh a ni.

Syrian Observatory for Human Rights chuan inkahhai puan a tawp ruala Aleppo chhehvela beihpui thlaknaah hian mi 32 an thi niin a sawi a, chhawmdawlna phurtu truck hi Aleppo khaw≠thlang lam pana a tlan laiin Umar al-Kubra khaw bulah kah fuh a ni a, mi 12 an thi niin a sawi. Aleppo khaw chhehvela beihpui thlaktu hi Syria nge Russia indo thlawhtheihna zawk tih hriat≠chian a la ni lo nia sawi a ni bawk.

Syrian Red Cresecent official chuan pawl motor, chhawmdawlna phurtu kahfuh a nih thu sawiin, he thil thleng hian a ti thinrim hle tih a sawi. Civil mi, tualchhung indona thleng avanga hun rei tak chhung harsatna nasa tak tawkte chhawmdawlna tur phurtu motor beih a ni mai chu a lungawi thlak loh hle tih a sawi.

Russia sipiate chuan inkahhai puan a tawp rual hian helho chuan Aleppo chhimthlang lama Syria sipaite awmna hmun chu an bei nghal a, sipaite tan hian beih let loh theih a ni lo, a ti.

Aleppo khawchhak lama chhawmdawlna pe tur pawh an tum hmun an thleng thei lo a, UN chuan chhawmdawlna thawnluh tur hi lo dangah Syria sorkar a puh a, mahse Russia official-te chuan helhoin kawngpui an beih vangin an kal thei lo niin an sawi thung.

Russia Lieutenant Genreal Sergei Rudskoi chuan kar khat inkahhai puan a nih chhung khan helho chuan inremna siam hi
ṭum 302 zet an bawhchhe hman a, civil mi 63 leh Syria sipai 153 an kaphlum hman niin a sawi a, hei vang hian inkahhai puan tak pawh chu awmze nei lo nia an ngaih thu a sawi. Mahse eptu lam chuan sorkar sipai leh sipai thlawptu lam chuan ṭum 254 dan an bawhchhia niin an sawi thung.