Greece-a Moria camp a kang

Greece rama pem lutte awmkhawmna, Lesbor thliarkara Moria camp-ah kangmei nasa tak a chhuak a, puan in eng emaw zat a kang ral.

Kangmei chhuak vang hian camp-a awm mi 4,000 te chu thiar chhuah an ni a, hliam tuar an awm lo. Camp-a awm
ṭhenkhatte chu kangmei ṭhelh mih a nih hnu hian an awmna lamah an kir leh a, mahse tam tak chu awmna nei loin kawtthlerah an khawsa zui a ni.

Police- te chuan kangmei chhuah chhan hi an chhui mek a, hal luih a ni em tih an chhui. Mahse hnathawktu awmte chuan chaw chungchanga camp-a awmte inkara buaina a chhuah hnuah kangmei hi a chhuak zui ta niin an sawi.

Lesbos-ah hian raltlan 5,600 vel an awm mek niin UN chuan a tarlang. Mahse he camp hi mi 3,600 awm theihna tura duan a ni. Kangmei chhuak hian camp 30% vel a tichhia a ni.

Greece state news agency, ANA chuan camp-a raltlan awmte chu Turkey ramah thawn kir an ni dawn nia thuthang a awm avangin buaina hi a chhuak ta niin a tarlang. Lesbos thliarkara raltlante awmte chuan Turkey rama kir leh hi an duh lo nia sawi a ni. Raltlante hian Greece sorkar hnenah inhumhimna an dil a, an dilna hi ngaihtuah a nih chhung chu Lesbos-ah hian an lo awm a ni.