UN General Assembly-in raltlante pualin ruahmanna siam

UN General Assembly-in Thawhṭanni-a New York-a raltlante chungchang ngaihtuaha summit a neihah, raltlante harsatna tawh hrang hrangte sawiho a nih hnuin 'New York Declaration for Refugees and Migrants' an siam.

Summit-a tel ram hruaitu 193-te chuan khawvela raltlan leh pem maktaduai 65 chuang zette himna turin khawvel ram hrang hrangte chuan mawhphurhna an nei tih sawiin, raltlante dikna chanvo humhalh sak a, chhawmdawlna ṭha zawk pek leh, an awmna hmunah an hnathawh tur ngaihtuahsak te an rel an ni.

UN Secretary General Ban Ki-moon chuan member ramte'n phek 22 zeta chhah, 'New York Declaration for Refugees and Migrants' an siam thei chu lawmawm a tih thu a sawi a, declaration siam a nih tak avang hian raltlan zinga naupang tam zawkte'n school an kal thei ang a, an zinga tam takin ramdangah hna thawh tur an zawng thei dawn bawk a ni, a ti.

Declaration an siam tak avang hian member ramte chuan raltlan leh dinhmun ṭha zawk beiseia pem te himna leh kalphung fel tak a awm theihna turin inbiakna an nei ang a, kum 2018-ah hemi chungchang ngaihtuah hian international confe≠rence an nei bawk ang. Dinhmun khirh leh ralṭitna hmuna an awma enkawlna pek an nih dan tura kaihhruaina te, ram hrang hrangten raltlante enkawl zuina kawnga mawhphurhna an insem dan turte an duang dawn a ni.