Turkey-in firfiak thlawpa puh zirtirtu 28,000 a ban

Turkey sorkar chuan July thlaa sorkar paihthlak tuma beihna chungchang a chhuina kalzelah, zirtirtu 28,000 chu an hna aṭangin a ban.

Thuneitute chuan zirtirtu 28,000 te hi sorkar paihthlak tumte nen inzawmna neiha puhin a ban a, midang 6,500 pawh suspend-in an chungchang hi a chhuichiang mek.

Cabinet meetingn neih zawh hnua chanchin thar lakhawm tute a kawmnaah, Deputy Prime Minister Nurettin Canikli chuan firfiakte dapchhuah hna an thawh chhunzawm zel tih sawiin, firfiak pawl nena inzawmna nei sorkar hanthawk eng emaw zat ban an ni tawh a ni, a ti. Hetihlai hian zirtirtu 455 chawlhtir te chu an chungchang chhui chian a nih hnuah an hna thawh chhunzawm tir an ni.

July 15-a sorkar paihthlak tuma beitu, sipai ṭhenkhatte hneh an nih hnuah Turkey thuneitute sorkar beihnaa mawhphurtu bera a puh, US-a khawsa mek Islam hruaitu Fethullah Gulen nena inzawmna neia puh, university 15 leh secondary school 1,000 vel a kharsak nghal a ni. Zirna in tam tak khar a nih vang hian zirlai 200,000 chuangte chuan harsatna an tawk mek a ni.

Sorkar beihna thlawpa puh sorkar hnathawk 100,000 chuang zet chu ban leh suspend an ni tawh a, an zingah hian judge, prosecutor, police leh sipai officer eng emaw at an tel. Mi 40,000 vel hren an ni bawk.