Somalia mipui 40% in khamkhawp ei tur nei lo

United Nations chuan Somalia ram mipui 40% vel zet chuan khamkhawp ei tur an nei lo tih a sawi a, mi 10 zela mi pali velin an mamawh ang ei tur an nei pha lo a ni.

Kumin February thla aṭang khan khamkhawp ei tur nei lo hi an pung nasa hle a, mi makta≠duai nga an tling tawh. Hetihlai hian al-Sbabah firfiak pawl leh African Union thlawp Somalia sorkar-te chu an la inbei chhunzawm reng a ni. Hei bakah hian ruahtui a tlak ṭhat loh avangin an thlai thar pawh a tlem phah hle.

Somalia tualchhung indona thleng vang hian mi tam tak chu an raltlan a, khawvela refugee camp lian ber, Kenya-a Dadaab-ah chuan raltlan nuai thum zet a awm a, an zinga a tam ber chu Somalia aṭanga tlanchhia an ni. Mahse Kenya sorkar chuan Dadaab camp hi November thlaah ṭhiah a tum a ni. He camp aṭang hian Somalia mi sing chuang zet chu an ram lamah an kir tawh bawk.

Dadaab camp aṭanga kirte chuan an rama an kir leh chu an tisual hle niin an insawi a, aid agency-te chuan ei tur an pe lo a, pawisa tlemte an pek chu an mamawh leina atan an hmang zo thuai niin an sawi. Rilṭam manganga an awm laiin hel leh sorkar lam an indo reng bawk niin an sawi.

UN chuan Somalia rama naupang, kum nga hnuai lam zinga nuai thum chu taksa mamawh ang ei tur ṭha hmu pha loin an awm mek tih an sawi a, an zinga 50,000 te chu an dinhmun a ṭha lo hle a ni, a ti. Hei vang hian ram hrang hrang hnenah Somalia ram mipuite chhawmdawlna pek belh turin a ngen.