Duterte-a'n EU chhang let

Philippines President Rodrigo Duterte chuan an rama dan kalha damdawi zuarte laka beihpui a thlak mek chungchanga European Union Parliament-in sawisel a, damdawi zuara rinhlelh tihhlum ṭhin nia puh a, titawp tura a ngenna chu na takin a chhang let.

UE member-te chuan Phillipines sorkarin 'war on drugs' a kalpui mekah, mihring dikna chanvo nasa taka a palzut nia sawi chu chiang zawka chhuizui an phut thu an sawi a ni.

June 30-a President atana Duterte lakluh a nih hnu a, dan loa damdawi zuarte laka beihpui thlaknaah hian police-te chuan mi 3,500 chuang an tihlum tawh nia sawi a ni.

Duterte chuan, "European Union-in min demna thu an siam chu ka chhiar a, lo inrawlh ve suh se" tiin nimina Davao City-a thu a sawinaah a sawichhuak. EU chu nih lohna anga lan tur, verther tak niin a puh bawk. An member ram, a bikin France leh Britain-te, Middle East-a an lo chet tawh dante chu an hre vek a, hetichunga an la sawisel ngam chu mak a tih thu a sawi. Ṭawngkam chhe takin EU chu a sawi zui.

Philippines President chuan EU chu tun hma lama mi ram a luahsak avanga, a thil lo tihsual leh inthiam lohna a neihte hliahkhuhna atana zangnadawmna pek tumah a puh bawk.

Duterte hian beihpui an thlak mek chungchang sawiseltu, United Nations Secretary Genral Ban Ki-moon leh US Presidetn Barack Obama-te pawh ṭawngkam mawi lo takin a lo changlet tawh bawk a ni.