Khawvel lawrkhawm

World Bank President atan Kim ruat nawn

World Bank executive director-te chuan president ṭanglai, Jim Yong Kim chu term hnihna chelh chhunzawm turin lungrual takin an thlang. Kim hian kum 2017, July 1 aṭangin kum nga chhung atan a hna hi a chelh chhunzawm ang.

Kim hian kum 2012, July 1 aṭang khan World Bank president 12-na ni turin a hna a thawk ṭan a, hemi hma hian zirna in lar tak, Darmouth College-ah president a ni ṭhin.

World Bank president hotu hna chelh nawn tura thlan a ni chu lawmawm a tih thu sawiin, Kim chuan bank staff leh member ramte chu theihtawpa thawhpui zel a tum tih a sawi.

West Bank-a Israel club inkhelh khap turin ngen

Human Rights Watch chuan Football thuneitu sang, FIFA hnenah Israel team-te chu Israel-in Palestinian ram a luahsak, West Bank-a Juda-te chenna hmuna inkhelh khapsak turin a ngen.

Palestine Liberation Organization (PLO) pawhin FIFA hnenah hian ngenna thlenin, West Bank-a Israel team inkhelh phalsak an nih chuan FIFA chu politics thilah a inrawlh a, Israel-in Palestinian ram a luahsak chu a thlawp tihna a ni dawn a ni, a ti. Hemi chungchang hi FIFA chuan October 13-14-a executive meeting neih hunah a ngaihtuah rin a ni. Tun thla tir lam khan European Parliament-a member 66-te chuan FIFA President hnenah West Bank-a Juda te chenna hmuna Israel club awm khap turin an lo ngen tawh bawk.

Typhoon Megi tleh vangin mi panga thi

Thlipui, typhoon Megi tleh vangin China leh Taiwan-ah mi panga an thi tawh a, mi 300 dawnin hliam an tuar.

Thawhṭanni khan darkar khata km 118-a naiin Megi hi China-a Fujian province-ah a tleh a, ruah nasa takina sur zui bawk. Thlipui tleh leh ruahsur nasa avang hian school te khar a ni a, thlawhtheihna thlawk tute pawh din tir an ni bawk. Megi hian China aṭanga Taiwan lam panin, Thawhlehni chawhnu lam khan darkar kahta km 162-a chakin Taiwan-ah a tleh leh. Thlipui tleh leh ruahsur nasa avang hian leimin leh tuilian a thlen hlauhthawn thlah tlang dunga cheng mi 8,000 chu hmun him lamah sawnchhuah an ni.