Israel President hlui Shimon Peres a thi

Israel President hlui, Shimon Peres chu kum 93 mi niin nimin khan a thi.

Shimon Peres hi kar hnih liamta khan stroke avangin damdawi-inah enkawl a ni a,
ṭhat lam a pan nia an hriat laiin Thawhlehni khan a zual leh thut a, nimin zing dar 3 vel khan a chatthla niin a doctor, Rafi Walden chuan a sawi.

Shimon Peres-a hi Zirtawpni-ah vui a ni dawn a, a vuinaah hian ram hrang hrang aṭangin hruaitu eng emaw zat an tel rin a ni. US President Barack Obama, Catholic Pope Francis leh Britain lal fapa, Prince Charles-te chuan an tel tur thu an tichiang tawh.

Vawiin-ah Peres-a kuang hi Knesset-ah dah a ni ang a, mipuiten an tlawh theih turin gate-te pawh hawn a ni ang. Zirtawpni chawhma dar 11-ah vuina inkhawm hi ṭan a ni dawn a, a ruang hi Jerusalem-a Mt Herzl-ah phum a ni ang.

September 13-a stroke vanga Tel Aviv damdawi-ina dahluh a nih khan khawvel ram hrang hrang hruaituten a ṭhat chhuah leh theih nan duhsakna an hlan a ni. September 18 khan Peres-a office chuan hma a sawn zel nia sawiin, khawl hmanga an thawktir pawh a ngai lo thei thuai dawnin a sawi a, mahse Thawhlehni khan a dinhmun hi rawn ṭha lo leh thuin a tuar chhuak zo ta lo a ni. January thla khan Peres hi lung lam ṭha lo avangin ṭum hnih damdawi-inah dah luh a lo ni tawh bawk.

Israel President term khat leh Prime Minister term hnih chelh tawh, Shimon Peres-a hian an ram hruaina kawnga chanvo pawimawh chu a chelh kim deuh vek tawh a ni. Kum 1994 khan President a nih laiin Israel-Palestinian inremna siam kawnga an hmalakna avangin Prime Minister Yitzak Rabin leh Palestinian hruaitu Yasser Arafat nen chawimawina sang, Nobel Peace Prize an lo dawng tawh bawk a ni.

Kum 1923-a Winsniew, Poland rama piang, Shimon Peres hi kum 11 a nihin Palestinian ramah an pem a, kum 1934 khan Tel Aviv-ah an pem leh a ni. Poland rama an chhungte chu kum 1941-a Nazi ten Juda mite an suatnaah khan tihhlum vek an ni.

Zionist movement a zawm a, kum 1959 khan parliament, Knesset inthlanah Mapai party aṭangin member atan thlan tlin a ni. Hemi hnu hian chanvo pawimawh hrang hrang a chelh chho a, president, prime minister, defence minister, foreign minister hna te a chelh tawh bakah, ministry dang pariat pawh a lo enkawl tawh bawk.

Defence ministry a enkawl lai hian Mirage jet fighter supply turin France chu inremna a siampui a, Israel secret nuclear facility a din bawk. Kum 1976-a Palestinian-te'n Israel thlawhtheihna Entebbe, Uganda rama an hruaikawi lai khan Defence minister a ni a, thlawhtheihnaa chuang mi 100 te chhanchhuah hna thawh pawh kha a enpui a ni.

Kum 2014-a President
aṭang≠a a chawlh hnuah pawh khawtlang rawngbawlna lamah a inhmang zui zel a, Israel leh Palestinian inkara boruak ṭha siam tumin a NGO din, Peres Centre for Peace hmangin theihtawpin a thawk zui reng a ni.