Charlotte khawpuiah emergency puang

US-a North Carolina state governor chuan police-te'n mihang an kahhlum avanga buaina nasa tak a chhuah hnuah, Charlotte state-ah emergency a puang.

Thawhlehni khan mihang kum 43 mi, Keith Lamont Scott chu police-in a kaphlum a ni. A kaphlumtu police chuan, Scott hi a silai dahthla tura vawi tam tak a hrilh hnuah pawh a dah duh loh avangin a kap ta niin a sawi a, mahse Scott-a chhungte chuan a kah lai hian lehkhabu a chhiar niin an sawi thung.

Scott kahhlum a nih avang hian Thawhlehni zan khan mipui lungawi lote'n buaina nasa tak an siam zui a, police-te nena an intihbuainaah police officer 16 in hliam an tuar. Mipui thinrim hian journalist te pawh an bei tel a, tukverh darthlalangte an vawm chhia a ni. Nilaini zan khan nawrh hi huaihawt leh a ni a, police officer-te chu bur leh hmanraw dangtein an tawng a, police-te hian mipui pungkhawm hnawhdarh nan tear gas an hmang a ni.

Charlotte-Mecklenburg Police Chief Kerr Putney chuan, Scott hi a car aṭangin silai kengin a chhuak a, a hnuah a car-a a let leh chu police officer-te chuan vawi tam tak a silai dahthla turin an hrilh niin a sawi. Mahse car aṭang hian a silai keng chunga rawn chhuak lehin, an lo kap ta a ni. A silai hi police officer-te lam hawiin a lek chhuak em tih erawh a hriatchian loh thu a sawi.

Kar kalta Zirtawpni khan chhim lam, Oklahoma state-a Tulsa khuaah mihang, Terence Crutcher chu police-te'n an kaphlum tawh bawk. Kum 40 mi, Crutcher hi police officer-te'n an man dawnin ban phar turin an hrilh a, a ban phar lai chu officer Betty Shelby chuan a lo kap a ni.