UN Assembly-ah Suu Kyi-in thu a sawi

New York-a UN General Assembly neih mekah, Myanmar Counsellor leh Foreign Minister, Aung San Suu Kyi-i chuan Nilaini khan thu a sawi a, Myanmar ram hruaitu a nih anga thu a sawina hmasa ber a ni.

Kum 71 mi, Suu Kyi-i hi an rama democracy tundin tuma a beihna avangin, sipai sorkarin pawn chhuak thei loin kum 15 chhung a lo hreng tawh a ni. Nikum November thlaa in-thlanpui neihah a kaihhruai party chu hneh taka thlan tlin an ni a, mahse sipai sorkar laia an ram danpui siam hnuaiah ramdang mi pasalah nei a, fa a neih avangin president a ni thei ta lo a ni.

Suu Kyi-i chuan kum 2012-a an rama Rohingya Muslim leh Buddhist inkara buaina nasa tak chhuahna, Rakhine state-ah human rights record siam-
ṭha tura theihtawp a chhuah tur thu a sawi. Rohingya erawh hminghmerhin a lamchhuak lo a, mahse UN hotu hlui Kofi Anna-a kaihruai commission-in Rakhine state-a buaina chinfel tura hma an lakna chu theihtawpa thlawp zel a tum thu a sawi.

Myanmar sorkar thar chuan an rama remna leh muanna a awm theihna tur te, kawng hrang hranga hmasawnna a awm theih nante a thawk a ni tiin, Suu Kyi-i chuan ramdangte'n an lo zirchian leh, an sawisel pawh dawngsawng turin an inpeih reng tih a sawi. Hetihlai hian human rights activist ṭhenkhat chuan Suu Kyi-i'n Rohingya hming a lam ri lo leh, Myanmar sorkain an ram dik tak anga a la pawm thei lo chu an sawisel a ni.